Вольны хор
СПЯВАЕМ - ПЕРАМАГАЕМ!
Вольны хор — унікальны грамадска - культурны рух, які з’явіўся падчас пратэстаў у Беларусі і стаў сімвалам Рэвалюцыі для мільёнаў людзей
Пра нас
25 жніўня 2020 Вольны хор зладзіў сваю першую спеўную акцыю і загучаў у Гандлёвым цэнтры «Сталіца». З самага пачатку свайго існавання ён стаў актыўным удзельнікам пратэстнага руху і моцным інструментам натхнення Беларусаў
357 чалавек

Спявалі ў Вольным хоры за ўвесь час яго існавання
6 кліпаў

Запісаў Вольны хор за 2 гады
103 выступы

Зладзіў Вольны хор з 2020 года
58 песень і гімнаў

Мае хор у сваім рэпертуары
"Вольны хор — адзін з сімвалаў беларускага пратэсту. Дзякуючы яму ў розных кутках Мінска і Беларусі гучалі песні супраціву, а беларусы вывучылі знакамітыя песні "Пагоня" і "Магутны Божа"."
Еўрарадыё
Як паўстаў Вольны хор
Вольны хор пачаўся з акцый, якія ладзілі музыкі Беларускай дзяржаўнай філармоніі ў жніўні 2020 года. Амаль адразу да іх далучыліся ўдзельнікі іншых мінскіх калектываў: дырыжоры, вакалісты, артысты хору, інструменталісты, рэгенты, барды, народныя музыкі і звычайныя людзі, якія хацелі спяваць.
Прафесіяналаў і аматараў аб'яднала адно: жаданне спыніць гвалт і вярнуць справядлівасць.

Дзейнасць хора ў Беларусі
Вольны хор ладзіў флэшмобы ў буйнейшых гандлёвых цэнтрах, прымаў удзел на дваравых канцэртах у розных районах Мінску, стварыў спеўную калону і спяваў на маршах мірнага пратэсту з жніўня па лістапад 2020, падтрымліваў спевамі звольненых актораў-купалаўцаў і супрацоўнікаў Мінскага Трактарнага Заводу, удзельнічаў у акцыях у оперным тэатры, у метро, на чыгуначным вакзале, на "Камароўцы".
За гэты час Вольны хор запісаў два аўдыаальбома "Годныя песні", зладзіў тры анлайн канцэрты, удзельнічаў у розных тэлевізійна-музычных праэктах, запісаў 6 відэакліпаў.

Затрыманні
Дзесяткі ўдзельнікаў калектыву былі затрыманыя, адбывалі турэмны тэрмін ад 10 да 30 содняў ці плацілі велізарныя штрафы за песенныя акцыі, некаторыя па некалькі разоў. На некаторых з удзедьнікаў сталі заводзіць крымінальныя справы, якія паграджалі ім тэрмінамі ад 8 да 20 гадоў.

Эміграцыя
Шмат хто са спевакоў Вольнага хору быў вымушаны з'ехаць з Беларусі праз пераслед і пагрозу арышту. З канца чэрвеня 2021 года хор працягвае сваю дзейнасць у Польшчы, ладзіць шматлікія канцэрты і гастролі, пад час якіх распавядае пра гістарычнае мінулае, жудаснае сучаснае і светлую будучыню Вольнай Беларусі.

Варшаўскі перыяд
Знаходзячыся ад канца чэрвеня ў вымушанай эміграцыі ў Варшаве, Вольны Хор ператварыўся ў больш значную арганізацыю, Fundacja Volny Chor, якая аб’яднала вакол сябе выбітных беларускіх дзеячаў культуры, каб не толькі захаваць беларускую культуры ў эміграцы, але і спрыяць яе развіццю на тэрыторыі Беларусі і распаўсюду па ўсім свеце. Для гэтага Вольны хор працягвае канцэртную дзейнасць, запісвае кліпы і альбомы, уключае ў рэпертуар творы, напісаныя беларускіімі творцамі, рэпрэсаванымі ў розныя гістарычныя часы, развівае адукацыйны напрамак дзейнасці, каб больш беларусаў ведалі пра гістарычна-культурную спадчыну сваёй Радзімы.
Нягледзячы на ўсе складанаcці, рэпрэсіі і ціскі Вольны хор жыве і працягвае спяваць! Вольны хор стаў сымбалем беларускага пратэсту, ён нясе беларускую песню, як сцяг!

Рэпертуар
Рэпертуар Вольнага Хору складаюць творы беларускіх аўтараў, у якіх адлюстравана любоў і павага да Радзімы. Творы, якія абуджаюць патрыятычныя пачуцці і надаюць моцы.
Важным для нас з’яўляецца адраджэнне забытых твораў, пошук згубленных і іх вяртанне ў сучасную музычную прастору. Таму большасць песен у нашым рэпертуары гэта творы, напісаныя ў 30-40-х гадах мінулага стагодзя, сярод якіх: «А хто там ідзе» на сл. Я. Купалы, «О, Беларусь, мая шыпшына» на сл. Ул. Дубоўкі, «За Случчыну» на сл. Н. Арсеньевай, шэраг твораў такіх кампазітараў, як: Мікола Равенскі, Мікола Шчаглоў-Куліковіч, Уладзімір Тэраўскі. Аўтары нашых песен маюць складаныя лёсы. Некаторыя з іх былі растраляныя савецкімі ўладамі, высланы з краіны. Шмат твораў выдаваліся за мяжой падпольнымі выдавніцтвамі, шмат твораў назаўсёды загінула, а тыя, што засталіся былі забыты ці забаронены па сёняшні час. Нашай дзейнасцю мы спрыяем вяртанню і адраджэнню беларускай музычнай спадчыны.
Таксама ў нашым рэпертуары мы выконваем творы і апрацоўкі сучасных кампазітараў, некаторыя з якіх былі спецыяльна напісаныя для Вольнага хора. Такім чынам мы будуем масты паміж мінулым і сучаснасцю, апавядаем пра актуальнасць твораў і сугучнасць часоў.
Мы жадаем, каб беларуская песня загучала ва ўсіх кутках нашай краіны і ва ўсім свеце. Мы верым, што гэтымі песнямі мы зможам аб’яднаць беларускі народ. Спадзяемся, што песні з рэпертуару Вольнага Хору стануць добрым падмуркам для стварэння сапраўднага «Свята Песні» ў Беларусі.
Бліжэйшыя падзеі
8 чэрвеня 2022
🕜 18:00
8 чэрвеня 2022
🕜 18:00
Мы разам
Канцэрт салідарнасці з Украінай
📍 Месца: Рыга

🎫 Уваход па запрашэннях: https://forms.gle/BfmqN1k3JXrtD6DL8
Відэа
Канцэрты
Кліпы
Акцыі
Аўдыа
Мы ў СМІ
Беларускія СМІ
Замежныя СМІ
Кантакты для супрацоўніцтва
Fundacja Volny Chor, Warszawa
mail: volnychoir@gmail.com
Made on
Tilda